Publisert 16.12.06 i – Comments Off

Eg er Vebjørn. Noka objektiv framstelling av meg og mitt finn du nok ikkje her, men eg kan vel nøkternt opplysa om at eg er ein eksilsiddis med sterk forkjærleik for målsak, fotball og Bjerkreim kommune. Eg er stort sett i godt humør, men eg har temperament om det trengst, og av og til når det ikkje trengst. Utover dette er det vel ikkje stort anna å leggja til enn at eg er velsigna eller forbanna – alt etter som – med ein kronisk hang til å formulera meg i særs langtekkjelege vendingar.

Sådär. Då reknar eg med at informasjonsturftene dine er dekte. Skulle det ikkje vera tilfelle, så får du senda meg ein e-post til straumbrev(A)totlevase(.)net, eller ei melding på Twitter (@totlevase). (Før du spør: Nei, eg er ikkje på Facebook. Eg skal vurdera å melda meg inn der om Datalagringsdirektivet vert implementert i norsk lov, men inntil det skjer, klamrar eg meg fast til dei siste vesle flikane av personvern som finst igjen i dette landet. Fråvær av medlemskap i Facebook er altså ein slik flik, i alle fall i nokre månader til.)